“Матурлыҡ тыуҙырыусы матурҙар”

25 март, Рәсәй мәҙәниәт хеҙмәткәрҙәре көнө айҡанлы, район мәҙәниәт һарайында “Матурлыҡ тыуҙырыусы матурҙар” исемле ҡул эштәре күргәҙмәһе үтте. Фойела күҙ яуын алырлыҡ селтәр-ҡашмауҙар, алҡалар, бисерҙән эшләнгән муйынсаҡ-беләҙектәр ҡуйылғайны. Бөрйән районы мәҙәниәт бүлеге начальнигы Клара Мөнир ҡыҙы Тләүбаева ошо матурлыҡты тыуҙырыусы оҫтабикәләргә – Сәүиә Аминева, Таңһылыу Балдыбаева, Таңһылыу Ғимрановаға мәҙәниәт бүлегенең рәхмәт хаттарын тапшырҙы. Сараның төп маҡсаты – ҡул эштәренең күркәмлеген ошо күргәҙмәлә күрһәтеү, хеҙмәткә һәм боронғо кис ултырыуҙарҙа эшләнгән ҡул эштәренә ҡыҙыҡһыныу тәрбиәләү. Буш ваҡыттарында әллә күпме файҙалы эш башҡарып, зауыҡлы әйберҙәр менән үҙен генә түгел, башҡаларҙы ла ҡыуандырып йәшәгән оҫтабикәләребеҙгә артабан да уңыштар, бәхет, ғаилә именлеге теләйбеҙ!